Valdís Þóra Jónsdóttir úr Golfklúbbnum Leyni á Akranesi var hársbreidd frá sigri á LET Access mótaröðinni en mótaröðin er sú næst sterkasta í Evrópu.
Mótið fór fram á Spáni og endaði Valdís Þóra í 2. sæti. Þetta er besti árangur Íslandsmeistarans 2017 á LET Access mótaröðinni.
Valdís Þóra, sem var kjörinn íþróttamaður ársins hjá ÍA 2016, var nálægt því að skrifa nýjan kafla í golfsögu Íslands og vera fyrsta íslenska konan til þess að fagna sigri á atvinnumóti.
Golfklúbburinn Leynir óskar Valdísi Þóru til hamingju með árangurinn og sendir jákvæða strauma til hennar en næstu mót hjá Valdísi fara fram í Abu Dhabi, Indlandi og Kína. Það er því mikil törn framundan hjá Skagakonunni sem er í harðri baráttu um að halda keppnisrétti sínum á LET Evrópumótaröðinni.
Mynd með frétt er fengin af heimasíðu LET.
